எல்லாம் அவன் அருள்!

ராம நவமி அன்று நடந்த ஒரு சிறிய அற்புதத்தை சூட்டோடு சூடாக எழுதாவிட்டால் அதைவிட பெரிய அபசாரம் எதுவும் இருக்காது.
      

  ராம நவமி அன்று காலை, செங்கற்பட்டுக்கு அருகில் உள்ள யோக ராமர் கோவிலுக்குப் போகலாம் என்று என்னை என் சகோதரன் கூப்பிட்டார். பெரிய கார் வைத்திருக்கிறார். ஒரகடம் என்ற கிராமத்தில் அந்த கோவில் இருக்கிறது என்பதும் செங்கற்பட்டுக்கருகில் 15 கி.மீ. துரத்தில் ஒரகடம் இருக்கிறது என்பதுதான் தெரியும். விசாரித்துகொண்டு போகலாம் என்று கிளம்பி விட்டோம்.
          சிங்கபெருமாள் கோவில் போனதும் ஒரு கடைக்காரரிடம் ’ஒரகடம் எங்கிருக்கிறது?’ என்று கேட்டோம். அவர் ஸ்ரீபெரும்புதூர் போகும் பாதையில் சுமார் பத்து கி.மீ.போகச் சொன்னார். அதன்படியே போனோம். ஒரகடம் வந்தது. கோவில் எதுவும் கண்ணில் படவில்லை. அங்கு  ஒரு கடைக்காரரைக் கேட்டோம். “கோவில் எதுவும் இங்கு கிடையாது. இது இண்டஸ்ட்ரியல் ஏரியா” என்றார். நல்ல காலம். அங்கு போலீஸ் ஸ்டேஷன் இருந்தது
. அங்கு போய் கேட்டோம். ஒரு போலீஸ்காரர் “கோவில் இருப்பது வேறு ஒரு ஒரகடம். செங்கற்பட்டைத் தாண்டி 15 கி.மீ போகவேண்டும். இப்போது நான் அந்த பக்கம்தான் போகிறேன். என் பின்னாலேயே வாருங்கள்” என்று சொன்னபடியே மோட்டார் சைக்களில் அடுத்த செகண்ட் புறப்பட்டு விட்டார். அவர் திரும்பிப் பார்க்காமல் முன்னே போக, நாங்கள் அவரைப் பின் தொடர்ந்தோம். கிட்டதட்ட ஒரு பைலட் மாதிரி போனார். சுமார் 30 கி.மீ போனபிறகு மகாபலிபுரம் அருகில் ஒரு இடத்தில் நிறுத்தி, “இதுதான் ராமர் கோவில் இருக்கிற ஒரகடம். இதோ. இந்த ரோடில் நேராகப் போங்க. அரை கிலோமீட்டர் தூரத்தில் கோவில் இருக்கிறது” என்று சொன்னார். “ரொம்ப தேங்க்ஸ், சார்” என்று சொன்னதும் தலையை ஆட்டியபடியே போய்விட்டார்.
அவர் சொன்னபடியே போனோம்.. கோவில் வந்தது., யோக ராமரைத் திவ்வியமாகத் தரிசித்தோம்.
       இந்த தரிசனம் எப்படி சாத்தியமாயிற்று?. ஸ்ரீபெரும்புதூர் பாதை ஒரகடம் கிராமத்தின் கடையில் விசாரிக்கும்படி செய்தவர் யார்? கோவில் எதுவும் இங்கு

கிடையாது. என்று கடைக்காரர் சொன்னதும், மிக அருகில் இருந்த  போலீஸ் ஸ்டேஷனில் போய் கேட்கலாம் என்ற எண்ணத்தை எங்கள் மனதில் தோன்றச்
செய்தவர் யார்? இது மட்டுமா, மகாபலிபுரம் ஒரகடம் கோவிலைப் பற்றி அறிந்திருந்த போலீஸ்காரர் அங்கு அந்த சமயத்தில் இருக்கும்படி செய்தவர் யார்? அவருக்கு 30 கிலோ மீட்டர் தூரம் தள்ளி இருந்த மகாபலிபுரத்திற்குப் போக வேண்டிய வேலையை அந்த நிமிடம் கொடுத்தவர் யார்?
எல்லாவற்றையும் ஏற்பாடு செய்தவன் அந்த  சக்கரவர்த்தி திருமகன் தான் என்பதில் சந்தேகமே இல்லை.

         (இந்தச் சம்பவம் இன்றைய தினம்  நடைபெற்றதிலும் ஒரு ஆச்சரியம் உள்ளது. ”எல்லாம் அவன் அருள்” என்ற தலைப்பில் பின்னால் எழுத ஏழு உண்மைச் சமபவங்களை நேற்றுதான் குறித்து வைத்தேன். முதல் சம்பவமாக எதை எழுதலாம் என்று யோசித்துக் கொண்டிருந்தேன். இன்று ராமரே துவக்கி வைத்து விட்டார்!)