“சார் நாங்கள் எல்லாருமாக "டிஸைட்' பண்ணி விட்டோம்... இருபது வருஷமாக நம்ப ஊரில் முக்கியப் புள்ளியாக இருந்து வர்றீங்க... நீங்கள் தான் நம் வார்டுக்கு முனிசிபல் கவுன்சில் எலெக் ஷனுக்கு நிற்கணும்'' என்று மணி சொன்னான், மிஸ்டர் பஞ்சுவிடம்.
“ஆமாம் சார். இது எங்களுடைய ஏகமனதான விருப்பம்'' என்று கோபு, ஸ்ரீரங்கன், சிட்டி முதலியவர்கள் பின்பாட்டு ஊதினார்கள்.
“ஏனய்யா காலை வாரி விட வேறே ஆள் கிடைக்கலையா? போங்கய்யா. அவங்க அவங்க வேலையைப் பார்த்துக் கொண்டு'' என்றார் பஞ்சு
பஞ்சுவின் இல்லத்தில் வராந்தாவில் குழுமியிருந்த ஜமா, ’ஜக்கு’'கிற வழியாக இல்லை!
"சீரியஸாகப் பேசுகிறோம். லைட்டாகத் தூக்கிப் போட்டு விடுகிறீங்களே! இன்டிபென்டன்டாக எலெக்ஷனுக்கு நில்லுங்க! நாங்க எல்லாரும் உயிரை விட்டு வேலை செய்கிறோம்.
"உயிரைத் தவிர உங்களிடம் என்ன இருக்கிறது'என்று ’ஜோக்' அடிக்காதீர்க'' என்றான் கோபு.
“தேர்தலில் நிற்கிறது என்பது என்ன சாதாரண காரியமா, என்ன? எவ்வளவோ கன்சிடரேஷன்ஸ் இருக்கிறது. முதலாவது மணி-'' என்று பஞ்சு கூற...
“இதோ இருக்கிறேன் ஸார், மணி!'' என்று மணி சொன்னான்.
“நீ செல்லாக் காசு! நான் சொன்னது மணி... பணம்! எக்கச்சக்கமாகச் செலவு ஆகுமே!'' என்றார் பஞ்சு.
“ஆக்சுவலி.. இதில் செலவு என்று பார்த்தால் இரண்டாயிரத்துக்கு மேலே போகாது'' என்றான் ஸ்ரீரங்கன்.
“இரண்டாயிரம் பைசாவுக்கு வழி கிடையாதே!'' என்றார் பஞ்சு.
“உங்களுக்கு எதுக்கு சார் கவலை? ஒரு உதவி நிதி சேர்த்துவிட மாட்டோமா?'' என்று கேட்டான் கோபு.
“பஞ்ச நிதி ஆயிற்று! இப்போது பஞ்சு நிதி'' என்று கேலியாகக் கூறினான் ராமு.
“பஞ்சு சார்! நேற்று சங்கத்திலே கூட ரொம்ப நேரம் "அனலைஸ்' செய்தோம். ஜனங்களுக்கு இப்போது "சிட்டிங் மெம்பர்' சுந்தரம் பேரில் ஏகப்பட்ட வெறுப்பு'' என்றான் சீனன்.
“சிட்டிங் மெம்பர் இல்லை சார். அவர் சீட்டிங் மெம்பர்'' என்றான் சிட்டி.
“செகண்ட்லி நம்ப வார்டுக்கு எந்தக் கட்சியும் கேண்டிடேட்ஸ் போடவில்லை. நிற்கப் போகிற எல்லாரும் சுயேச்சைதான். ஒரு சில கட்சிகள் சிலருக்கு ஆதரவு தருகின்றன. அதனால் நீங்களும் சுயேச்சையாக நில்லுங்க. நெல்லு மிஷின் நீலமேகம் 101 ரூபாய் டொனேஷன் தர ஒப்புக் கொண்டிருக்கிறார்'' என்று சொன்னான் வெங்கு.
