உதிரிப்பூ - துவளாதீர்கள்

 வெற்றியைக் கண்டு துள்ளினாலும் தவறில்லை. தோல்வியைக் கண்டு துவளக் கூடாது. அப்படித் துவண்டால் தோல்வி உங்களை வெற்றி கொண்டு விடும்.
    என் மிக நெருங்கிய  நண்பன் ராமசாமியின் கதையைக் கூறுகிறேன். நானும் அவனும் ஒரே பள்ளியில் ஒரே வகுப்பில் படித்தவர்கள்.
    அந்தக் காலத்தில் எஸ்.எஸ்.எல்.சி. பரீட்சைக்கு முன் பள்ளிக்கூடத்தில் "செலக் ஷன்' பரீட்சை என்று வைப்பார்கள். அதில் நல்ல மார்க் வாங்குகிறவர்களைத் தான் எஸ்.எஸ்.எல்.சி. பரீட்சை எழுத அனுமதிப்பார்கள். நிறையப் பேர் வடிகட்டப்படுவார்கள்.

 பரீட்சையில் என் நண்பன்  பொதுவாக 100க்கும் மேற்பட்ட  மார்க்குகளை வாங்கக் கூடியவன். கணக்குப் பாடத்தில் கோட்டைவிட்டு விட்டான்.
    எல்லா மாணவர்களின் மார்க் லிஸ்ட்டையும் அவரவர்களிடம் ஹெட்மாஸ்டர் கொடுத்தார். ஆனால் ராமசாமியின் லிஸ்டைத் தரவில்லை. ராமசாமி செலக் ஷனில் நிறுத்தப்பட்டிருந்தான். அது தான் நோட்டீஸ் போர்டில் போட்டாயிற்றே. ஏன் மார்க்லிஸ்டைத் தரவில்லை.
    ஹெட்மாஸ்டர் சற்றுக் கிண்டலாக "கடைசியாக ராமசாமியின் மார்க்கைப் படிக்கிறேன். நமது பள்ளிக்கூட வரலாற்றில் ராமசாமி ஒரு சாதனை படைத்திருக்கிறான்.
அவன் கணக்கில் வாங்கியிருக்கிற மார்க் முழுதாக பூஜ்யம். கால், அரை என்று கூடப் போட முடியாதபடி அபாரமாக எழுதியிருக்கிறான்'' என்றார். எல்லா மாணவர்களும் சிரித்தார்கள்.
    ராமசாமி ஏதோ பிரச்னையால் வெறும் பேப்பரை மடித்து கொடுத்திருக்கிறான். நன்றாக மார்க் வாங்கக் கூடியவன் "ஏன் இப்படிச் செய்தான்?' என்று அனுதாபததுடன் அவனைத் தனியாகக் கூப்பிட்டு ஹெட்மாஸ்டர் விசாரித்திருக்க வேண்டும். ஆனால் அவனை அவமானப்படுத்திவிட்டார்.
    ராமசாமி "ஓ"வென்று அழுது விட்டான். அந்தச் சமயம் அவன் நெஞ்சில் ஒரு தீர்மானம் உருவாகி இருக்க வேண்டும்.
    நம்புங்கள். அடுத்த ஆண்டு அதே பாடத்தில் பள்ளி இறுதித் தேர்வில் வாங்கிய மார்க்  நூற்றுக்கு நூறு.
    பின்னால் பி.ஏ., எம்.ஏ., என்று பாஸ் செய்து, இன்ஷ்யூரன்ஸ் கம்பெனியில் சேர்ந்து மளமளவென்று உயர்ந்து குறைந்த வயதிலேயே தென்னிந்தியாவிற்கே மேலாளராக ஆனான்.  சில ஆண்டுகளுக்கு முன் ஓய்வு பெற்றான்.
    ஹெட்மாஸ்டரின் கேலி அவனைத் துவளச் செய்திருந்தால் அவன் வாழ்க்கையே பூஜ்யமாயிருக்கும்.