கடிதப் புத்தகங்கள் இரண்டு - கடுகு ( UPDATED)

 சமீபத்தில் இரண்டு புத்தகங்களைப் படித்தேன். இரண்டு புத்தகங்களும் கடிதங்களின் தொகுப்பு. பிரபல எழுத்தாளர்களின் கடிதங்கள்.

முதல் புத்தகம் இசாக் அசிமாவ் எழுதியவை.( தன் பெயர் இப்படித்தான் உச்சரிக்கப்பட வேண்டும்  என்று அவரே எழுதி இருக்கிறார்.)

இரண்டாவது புத்தகம் நகைச்சுவை கவிதைகளை எழுதிக் குவித்த அக்டன் நாஷ்  தன் குடும்பத்தினருக்கு எழுதிய அன்புக் கடிதங்கள்.

அசிமாவ் ஒரு மேதை. விஞ்ஞான கதைகளிலிருந்து ஷேக்ஸ்பியரிலிருந்து பைபிளிலிருந்து நகைச்சுவை ஜோக்குகள் வரை ஏராளமான புத்தகங்களை எழுதியிருக்கிறார். "மூன்று நாட்களில் ஒரு புத்தகத்தை எழுதிவிடுவேன். ஆனால் ஒருவாரம் பத்து நாள் தாமதித்துத் தான் பதிப்பகத்தாருக்கு அனுப்புவேன். இல்லாவிட்டால் அவர்கள் நான் அவசரக்கோலமாக எழுதிவிட்டேன் என்று எண்ணி விடுவார்கள்” என்று அசிமாவ் தன் சுய சரிதத்தில் சொல்லியிருக்கிறார். 

546 புத்தகங்களை எழுதியுள்ளவர் அசிமாவ்.   அத்துடன்,  தனிப்பட்ட முறையில் நிறைய பேருக்கு கடிதங்களை எழுதியுள்ளார், அவர் வாழ்நாளில் எழுதிய கடிதங்களின் எண்ணிக்கை லட்சத்தை தாண்டுமாம். அவர் எப்போதும் கார்பன் பேப்பரை வைத்துத்தான் கடிதங்களைஎழுதுவாராம். சிலசமயம் அவர் கார்டுகளில் எழுதுவதும் உண்டு  அவைகளுக்குக் கணக்குக் கிடையாது.

அசிமாவ் எழுதிய எல்லாப் புத்தகங்களின் பிரதிகளையும் கடிதங்களையும் விஸ்கான்சின் சர்வகலாசாலையில் ஒரு பெரிய ஹாலில் நிரந்தரமாக காட்சியாக  வைத்தி்ருக்கிறார்கள்.

அசிமாவ் காலமான சில வருடங்களுக்குப் பிறகு அவரது மனைவி ஜேனட் ஜப்சன் அசிமாவின் கடிதங்களிலிருந்து பல கடிதங்களைத் தேர்ந்தெடுத்து தொகுத்துள்ளார். புத்தகத்தின் தலைப்பு யுவர்ஸ்... (YOURS..). இப்படி ஒரு புத்தகத்தைத் தொகுக்கப் போகிறேன் என்று ஜேனட் வெளியிட்ட அறிவிப்பைப் பார்த்த பலர், அசிமாவ் தங்களுக்கு எழுதிய கார்டுகளை ஃபோட்டோ காபி எடுத்து அனுப்பினார்களாம். சுமார் 330 பக்கப் புத்தகம். ஒவ்வொரு கடிதமும் ஒவ்வொரு வரியும் மிக மிக அபாரமானவை. ஒரு வரி கூட   ஆம் ஒரு வரி கூட-- விடாமல் ரசித்துப் படிக்கக் கூடிய புத்தகம். அசிமாவ் கடிதங்களைப் பின்னால் தனிப் பதிவாகப் போடுகிறேன்.

இரண்டாவது புத்தகம் ஆக்டன் நாஷ் தன் குடும்பத்தினருக்கு எழுதிய அன்புக் கடிதங்கள் தான். புத்தகத்தின் தலைப்பு:    LOVING  LETTERS  (லவ்விங்க் லெட்டர்ஸ்). கடிதங்கள் பாசத்திலும் நகைச்சுவையிலும் பரிவிலும் தோய்த்து எடுக்கப்பட்டுள்ளன.கடிதங்கள் எழுத சளைக்க மாட்டாராம்.  வெளியூர் சென்றால் தினமும் ஒரு கடிதம் போடுவாராம்.இந்த 400 பக்கப் புத்தகத்தைத் அவருடய மகள் லினெல் நாஷ் ஸ்மித் தொகுத்துள்ளர். அங்கங்கு குறிப்புகளையும் தந்துள்ளர். இன்னும் புத்தகத்தை  நான் படித்து முடிக்கவில்லை. ஆனால் அவரது பாடல் புத்தகங்களை ரசித்துப் படித்திருக்கிறேன். TRASHERYOF NASHERY. CANDY IS DANDY, THE BEST OF OGDEN NASH, OGDEN NASH OMNIBUS என்று   14  கவிதைப் புத்தகங்களை எழுதியுள்ளார். தான் எழுதிய சில   கவிதைகளை  சிறிது மாற்றி வேறொரு கவிதையாகவும் எழுதி இருக்கிறார் .
இவர் பாடல்களின் சிறப்பு நகைச்சுவை மட்டுமல்ல, சிலவற்றில் கடைசி வரிகளைச் சற்று அளவுக்கு அதிகமாக  நீட்டி  இருப்பார்..வித்தியாசாமான ஸ்பெல்லிங்க் இருக்கும்.

இந்தப் பதிவில் அவரது மூன்று கவிதைகளைத் தருகிறேன்.  சில கடிதங்களை மொழிபெயர்த்து ஒரு தனிப்பதிவாகப் போட எண்ணி இருக்கிறேன்.

THE PEOPLE UPSTAIRS

The people upstairs  all practice ballet

Their living room is bowling alley.

Their bedroom is full of conducted tours.

Their radio is louder than yours.

They celebrate weekends all the week.

When they take  a shower, your ceiling leak.

They try to get their parties mix

By supplying their guests with Pogo sticks,

And when their orgy atlast abates,

They go to the bathroom on roller skates.

I might love the people upstairs wondrous

If instead of above us, they just lived under us!

                                     (Written in 1949)

---------------------

GRANDPA IS ASHAMED

A child need not be very clever

To learn that "Later, dear" means "Never."

---------------

A CAUTION TO EVERYBODY

Consider the auk:

Becoming extinct because he forgot how to fly, and could only walk.

Consider man, who may well become extinct

Because he forgot how to walk and learned how to fly before he thinked.

பின் குறிப்பு: அப்பார்ட்மென்ட் அவதிகள் என்ற கட்டுரையை எழுதிக் கொண்டிருக்கிறேன் . அவர் மேலே எழுதியுள்ள கவிதையில் உள்ள  இரண்டு மூன்று ஐடியாக்கள்  என்னை அறியாமலேயே என் கட்டுரையிலும் இடம் பெற்றுவிட்டன.  சரி, யாராவது கேட்டால் நாஷ் என்னைப் பார்த்து காபி அடித்திருக்கிறார் என்று சொல்ல வேண்டியதுதான்!