டிக்கெட்டில்லாப் பயணம்

சுமார் நூறு புத்தகங்களை எழுதியுள்ள ஒரு பிரிட்டிஷ் எழுத்தாளரைப் பற்றி சில தகவல்கள்.

     அவர் பெயர் : C.E.M.JOAD. (1891 - 1953). ஒரு தத்துவ அறிஞர் அவர். நாற்பதுகளில் BBCயில் Brains Trust என்ற தலைப்பில் ரேடியோ கருத்தரங்குகளை நடத்தி பிராபல்யம் பெற்றவர்.

அவர் நடத்தும் கருத்தரங்குக்கு மிக நல்ல வரவேற்பு இருந்தது.கருத்தரங்கில் அவர் துவக்க உரை, முடிவுரை என்று மட்டுமல்ல, மற்றவர்களைக் கேள்வி கேட்பது, ஊக்கம் அளிப்பது என்று இவரே அதிக நேரம் பேசிக்கொண்டிருப்பார். அவர்  அடிக்கடி உபயோகிக்கும் ஒரு வாக்கியம்: “அது, நீங்கள் என்ன  அர்த்தத்தில் சொல்கிறீர்கள் என்பதைப் பொறுத்து இருக்கிறது.” என்று கூறுவாராம்.

 (நம்மூர் ஆன்மீகப் பேச்சாளர்களும் அரசியல் பேச்சாளர்களும் எப்படித் தேவையில்லாமல் கூடிய அளவு வார்த்தைகளைச் சகட்டுமேனிக்குச் சேர்த்துச் சேர்த்து, ’இருக்கும்’ என்பதை, ’இருக்கக் கூடிய’, ‘சொல்லும்’ என்பதை ‘சொல்லக் கூடிய’ என்று பேசுவதைக் கவனித்திருப்பீர்கள். அதுபோல JOAD அவ்வப்போது It all depends upon what you mean by...என்று வாக்கியங்களைத் துவக்குவாராம்.

இருந்தாலும் அவருடைய நிகழ்ச்சிக்கு நல்ல வரவேற்பு இருந்தது. ஜார்ஜ் பெர்னார்ட் ஷா, பெர்ட்ராண்ட் ரஸ்ஸல் போன்றவர்கள் அளவு அவர் பிரபலமாக இருந்தார். அவருக்கு ‘புரொபசர்’ என்ற அடைமொழியும் காலப்போக்கில் சேர்க்கப்பட்டு விட்டது.

அவருடைய ரேடியோ நிகழ்ச்சியை திடீரென்று BBC நிறுத்திவிட்டு அவருக்கு ‘டாட்டா’ சொல்லி விட்டது. ஏன்?

ஜோட் ஒரு சமயம் ஒரு கட்டுரையில் எழுதி இருந்தது : நான் ரயிலில் போகும் போது டிக்கெட் வாங்காமல் போய் ரயில்வேயை ஏமாற்றி விடுவேன்.

ஏப்ரல் 12, 1948 அன்று பலநாள் திருடன் ஒருநாள் அகப்பட்டுக் கொண்டார். டிக்கெட் இல்லாமல் பயணம் செய்த அவரை டி.டி.ஆர். பிடித்து விட்டார். டிக்கெட் கட்டணமும் அபராதமாக இரண்டு பவுண்டும் கட்ட வேண்டியிருந்தது. மறுநாள் லண்டன் பத்திரிகைகளில் முதல் பக்கச் செய்தியாக வந்தது. அதன் பலன் : பிபிஸி அவரது நிகழ்ச்சியை நிறுத்தி விட்டது.

      இந்த அவமானம் அவரைப் பித்துப் பிடித்தவராகச் செய்து விட்டது; அவரது உடல் நலத்தையும் பாதித்தது. படுத்த படுக்கையாகி விட்டாராம்!

       ஒரு டிக்கெட்டில்லாப் பயணம் நிகழ்த்திய வீழ்ச்சி!

         குட்டி பின்குறிப்பு : லண்டனில் பல வருஷங்களுக்கு முன்பு ஒரு டிபார்ட்மெண்டல் ஸ்டோரில் ஒரு பிரபல இந்திய நடிகை ஏதோ ஒரு பொருளை (தவறுதலாக?) எடுத்துத் தன் பையில் போட்டு, அகப்பட்டுக் கொண்டார். இப்படி ‘ரைட்’ கொடுப்பதை ‘க்ளெப்டோ மேனியா’ என்கிறார்கள்.