துணுக்கு மணிகள்

சமீபத்தில் LEO ROSTEN எழுதிய 400 பக்க புத்தகம் எனக்குக் கிடைத்தது. புத்தகத்தின் பெயர் People I have loved, known and admired. 37 அபாரமான கட்டுரைகள். அவற்றிலிருந்து ஒன்றிரண்டு கட்டுரைகளைத் தமிழ்ப்படுத்திப் போட வேண்டும் என்று என் மனது துடிக்கிறது. பின்னால் பார்க்கலாம்.

அந்தப் புத்தகத்தின் முன்னுரையில் சில குட்டித் தகவல்களைத் தந்திருக்கிறார். அவற்றை மட்டும் இங்கு தருகிறேன்.

RENOIR என்று ஒரு பிரபல ஓவியர் இருந்தார். அவர் தன் வீட்டுப் பணிப் பெண்ணாக GABRIEEL என்ற பெண்ணை வேலைக்கு வைத்திருந்தார். அந்தப் பணிப்பெண் சற்று களையான முகம் கொண்டவராக இருந்ததினாலோ என்னவோ, அவளை மாடலாக இருக்கச் சொல்லி படம் வரைந்தார். படம் நன்றாக வந்தாலும் ஏதோ அவருக்குத் திருப்தி ஏற்படவில்லை. 

அந்தப் பெண்ணின் சருமத்தின் நிறத்தில் ஏதோ கவர்ச்சியை அவர் கண்டார். தான் வரைந்த ஓவியத்தில் அது வெளிப்படவில்லை. அதனால் அவளை மீண்டும் வரைந்தார். அதுவும் சரியாக வரவில்லை.  RENOIR-ஐ  ஏதோ ஒரு வெறி பிடித்துக் கொண்டது. மீண்டும் மீண்டும் அவளை வரைந்தார்; திருப்தி ஏற்படவில்லை. இப்படி அவர், அந்தப் பெண்ணை மட்டும் வரைந்த ஓவியங்களின் எண்ணிக்கை, நம்புங்கள், 300-க்கும் மேல்!

RENOIR-ஆவது பரவாயில்லை. அந்தப் பெண்ணின் முழுமையான அழகு தனது ஓவியத்தில் வராததாலோ என்னவோ மீண்டும் மீண்டும் வரைந்தார்.

HOKUSAI  என்ற ஓவியருக்குப் பிடித்த பித்தைப் பாருங்கள். அவர் Mount FUJI  என்ற மலையை ஓவியமாக வரைந்தார். அதன் முழு அழகையும் ஓவியத்தில் கொண்டு வர பல்வேறு பருவங்களில், பல்வேறு கோணங் களில் பல்வேறு நேரங்களில் நூற்றுக்கணக்கில் வரைந்தார்.

CLAUDE MONET என்ற ஓவியருக்கு ஒரு சர்ச்சின் கட்டடத்தின் மீது காதல் ஏற்பட்டது. சூரிய ஒளியில் வெவ்வேறுநேரத்தில் வெவ்வேறு அழகு அதன் கூரையிலும் கோபுரத்திலும் ஜன்னல்களிலும் மாயாஜாலம் புரிந்த தாக அவர் உணர்ந்தார். பல ஓவியங்களைத் தீட்டினார்.

அவருக்கு திடீரென்று அல்லி மலர்கள் மீது பிரியம் ஏற்பட்டது. தண்ணீரில் மிதக்கும் அல்லி மலர்கள் அவரை கிறுகிறுக்கச் செய்தன. கிட்டத்தட்ட 50 ஓவியங்கள் வரைந்தாராம். ஓவியங்களின் அளவு என்ன தெரியுமா? 7 அடி உயரம் 15 அடி நீளம்!